زانستی كۆمه‌ڵایه‌تی

ئه‌م وێبلاگه‌ وتار و ڕه‌شنووسی هه‌فتانه له‌ سه‌ر ئه‌ده‌ب وزمانی كوردی،كۆمه‌ڵگا و سیاسه‌تی ڕۆژ بڵاو ده‌كاته‌وه.

Tuesday, October 04, 2005

ئه‌مریكا چیی كورده؟ دۆست، دوژمن یان هاوپه‌یمان؟


سه‌ربازێكی ئه‌مریكایی كه خه‌ریكی كوژاندنه‌وه‌ی وشه‌ی "كوردستان"ه
وه‌رگیراو له ڕۆژنامه‌ی ئاسۆ 147

Tuesday, September 20, 2005

مه‌له‌یه‌ک له ناو بووندا

.....

كه‌ڵه‌شێرێك كه وا ئه‌زانێت ته‌نیا خۆی زانیویه‌تی كه ڕۆژ ده‌بێته‌وه به ده‌نگێكی گڕ له په‌سا ده‌گوڕێنێت. شنه‌یه‌ك كه زیاتر له شه‌وبا ده‌چێت تا سروه‌ی به‌یانی، تێكه‌ڵ به‌ میلۆدییه‌كی لوڕی، ده‌دات له‌ له‌شت و هه‌ست به‌ بوون ده‌كه‌یت و له جیاوازیی له‌گه‌ڵ نه‌بووندا به پێست و له‌ش تێده‌گه‌یت. مانگ به‌ ڕوویه‌كی زه‌رده‌وه تریفه به سه‌ر شاردا ئه‌به‌شێته‌وه و شار له ڕووی زه‌ردی خۆی بێ‌به‌ش ناكات؛ ده‌ستیشی له ماسه و سیمان و ئاسنی شار ده‌خشێنێت و له‌مسی ده‌كات لێی تێ‌بگات. ڕۆشنایی زیاتر هی ڕۆژه و كه‌ڵه‌شێره‌كه زۆر هونه‌ری نه‌كردووه كه تێگه‌یشتووه ڕۆژ ئه‌بێته‌وه؛ ڕه‌نگه ته‌نیا هونه‌ری هه‌ر ئه‌وه بێت كه له به‌یانییه‌كی ئاوه‌هادا توانیویه‌تی به‌و ده‌نگه گڕیه‌وه چنگوڕك له مێشك و گیانم بدات. چه‌ند چركه‌یه‌ك بێده‌نگی، پێشكه‌شییه‌كی حاته‌م‌به‌خشانه‌یه له‌ لایه‌ن ئه‌و كه‌ڵه‌شێره‌وه كه له‌ به‌یانی ته‌نیا وه‌زیفه‌یه‌ك تێگه‌یشتووه.... .
شنه‌ و بوون به یه‌كه‌وه هه‌ست پێده‌كه‌یت؛ به‌یانییه‌كه وه‌ك به‌یانانی‌تر نییه كه خۆزگه‌ت ئه‌خواست له سه‌ره‌تاوه ده‌ستم كردایه‌ته‌وه به فڵانه كار، به فیساره شت و ته‌نانه‌ت به ژیان. هه‌ستێك به ته‌واوه‌تی دایپۆشیویت هه‌ستێك له‌و جۆره‌ی كه هه‌ر ئه‌و جارانه‌ی سه‌رت لێده‌دات كه ئه‌ته‌وێت كارێكی نوێ ده‌ست پێبكه‌یت و هیچ ڕابردوویه‌ك نییه كه ئازارت بدات و داهاتووش ته‌نیا له ئێستاوه ده‌ست پێده‌كات. هێمنییه‌ك له ئامێز ئه‌گری كه ئه‌گه‌ر ترسی كاتی بوونی نه‌بایه و به‌و ترسه كاڵ نه‌بوایه‌ته‌وه، ته‌واوی بێ ئۆقره‌یی و چه‌رمه‌سه‌ریی ژیان ده‌ژیا. شوپێنهاور ڕاستی ده‌كرد خۆشی شتێك نییه بێجگه نه‌بوونی ئێش و ژان. ڕه‌نگه ژیان هه‌ر ئه‌مه بێت، جارجار به له بیركردن یان ونبوونی، ژان نامێنێت و خۆشی ده‌رده‌كه‌وێت و ئه‌م خۆشییه ئه‌و هه‌موو ژان و به‌دبه‌ختییه دێنێت. ئێستایش ئیتر بیر له كاتی بوون یان نه‌بوونی ئه‌م چركانه ناكه‌یته‌وه و خۆت له نێو هه‌ستی بووندا نوقم ئه‌كه‌یت.... .
سه‌یره! ده‌ڵێیت زریانه‌كه‌ی دوێشه‌و هه‌ر نه‌بووه و ئه‌و لێشاوی ڕه‌شبینیشه ته‌نیا شتێكی نێو مێشكم بووه و شوێنێكی له دونیای ڕاستیدا بۆ نادۆزرێته‌وه. له جێگای خۆم ده‌وه‌ستم و دارستانی حه‌ز و هیوا و خۆشه‌ویستی و خولیاكانم ده‌پشكنم .... لق به لق و چڵ به چڵی ده‌گه‌ڕێم؛ به‌ڵام نه لقێكی شكاو و نه گه‌ڵایه‌كی وه‌ریویش، ته‌نانه‌ت قامكی تاقه لقێك سه‌رمای نه‌بووه. هه‌رچه‌ند له‌وانه‌یه ئه‌م هه‌ست به بوونه‌ی ئه‌مڕۆم له سۆنگه‌ی زریانێكه‌وه بێت كه ڕه‌نگه دوێشه‌و بووبێت به‌ڵام نا .. دوێنێ شه‌ویش وه‌كوو ئێستا ئارام بووه.

Wednesday, March 09, 2005

سروشتی زانست 1

زۆرجار زانست(Science (به‌ مانا وردبینانه و نوێیه‌كه‌ی، له‌گه‌ڵ وشه‌ی زانین و زانیاری(knowledge) تێكه‌ڵ ده‌كرێن. كاتێک كه مامۆستایه‌كی ئایینی باسی به‌ شوێنداچوونی عیلم ده‌كات مه‌به‌ستی زانینێكه له هه‌مبه‌ر نه‌زانینێكدا، نه‌ک زانینێک كه به‌ میتۆدگه‌لێكی تایبه‌ت وه‌ده‌ست هێنراوه، تاقیكراوه‌ته‌وه و پاڵێوراوه(زانست). له‌ لایه‌كی‌تریشه‌وه هه‌ندێ كه‌س كه جیاوازی ده‌خه‌نه نێوان زانست و زانین له به‌ر ئه‌وه‌ی كه زانست به زانسته سروشتییه‌كان تێگه‌یشتوون به شک و دوودڵییه‌وه له زانست بوونی زانسته كۆمه‌ڵایه‌تییه‌كان ده‌ڕوانن. لێره‌دا وه‌رگێڕانێک به ده‌ستكارییه‌وه له.Royce A. Singleton, Jr له سه‌ر سروشتی زانست له چه‌ند به‌شدا ده‌خه‌مه پێش چاو.
سروشتی زانست
له‌ مێژه كۆمه‌ڵناسی وه‌ک زانسته كۆمه‌ڵایه‌تییه‌كانی‌تر بانگه‌شه‌ ده‌كات كه زانستییه؛ به‌ڵام هێشتا هه‌ندێ كه‌س بڕوایان به‌م قسه‌یه‌ نییه و هه‌ندێكی‌تریش لایان وایه كه بێ‌گرنگیدان به‌وه‌ی كۆمه‌ڵناسیی زانستی چ مانایه‌كی ببێت، كۆمه‌ڵناسی له بنه‌ڕه‌ته‌وه له‌گه‌ڵ زانسته "ڕاسته‌كییه‌كانی" ‌تر دا جیاوازیی هه‌یه. ئاشكرایه كه وێنا( تصور) ی ئه‌م كه‌سانه له‌ زانست بوونی كۆمه‌ڵناسی، له‌گه‌ڵ وێنای ئه‌وان له‌ زانست بوونی فیزیک و كیمیادا ناگونجێت و یه‌ک ناگرنه‌وه. زانست له‌ لای ئه‌م كه‌سانه به‌ فۆرموول و تاقیكاریی نێو ئه‌زموونگه و كه‌ڵه‌كه بوونی فاكته‌وه ناسراوه.
به‌ڵام زانست له ڕاستیدا ته‌نیا كۆمه‌ڵێک له ڕاستییه‌كان و فۆرمووله‌كان و لووله‌ی ئه‌زموونگه و ئامرازگه‌لی وردكار و دۆزینه‌وه‌ و نوێكاریی سه‌رنجڕاكێش نییه. زانست له‌م شتانه زۆر گشتیتره. چون ڕێڕه‌و و میتۆده‌كانی لێكۆڵینه‌وه‌ له‌ پێش هه‌موو شتێك له سه‌ر بنه‌‌‌ما زانستییه‌كان دامه‌زراون، بۆ گه‌یشتن به مانایه‌كی گشتیتری زانست، تێگه‌یشتن له ئامانجه‌كان، تواناكان و سنوورمه‌ندییه‌كانی زانست زۆر گرینگه‌.

ویست و ئامانجی زانست
وشه‌ی Science له وشه‌ی لاتینیی Scientia وه وه‌رگیراوه كه به مانای زانیاری یه. هه‌ندێ كه‌س زانستی هاوچه‌رخ، به هه‌ڵه به په‌یكه‌ره‌‌یه‌كی زۆر قووڵ له زانیاری داده‌نێن. قووڵ به‌ شێوه‌یه‌ك كه كه‌سێكی مامناوه‌ندی لێی تێنه‌گات((Mazur,1968. به‌م پێیه ته‌نیا بابه‌ته قووڵه‌كان شایانی ئاوڕدانه‌وه و داوه‌ریین. به‌ڵام دۆزینه‌وه‌گه‌لێک كه ئه‌مڕۆ سووک و بێ‌به‌ها ده‌نوێنن له‌وانه‌یه خاڵی وه‌رچه‌رخانێكی گرینگ بۆ زانستی سبه‌ینێ بن. لێكۆڵینه‌وه‌یه‌ک كه زانستیار ڕه‌نگه‌ ته‌نیا له به‌ر زانخوازییه‌كی ڕۆشنبیرانه(Intellectual curiosity) به شوێنیه‌وه بێت و له لای كه‌سێكی ناشاره‌زا به بێ‌سوود و سووک سه‌یر ده‌كرێت له‌وانه‌یه بۆ چاره‌سه‌ریی گرفته‌ عه‌مه‌لییه‌كان به‌كه‌ڵک بێت. كێ بیری له‌وه‌ ده‌كرده‌وه كه ڕۆژێک لێكۆڵینه‌وه و دۆزینه‌وه‌گه‌لێک له سه‌ر هه‌ڵسوكه‌وتی جووتگرتنی مێروویه‌كی تایبه‌ت(كێچ) ، به‌سته‌ری كۆنتڕۆڵی تاعوون ئاماده‌ بكات؟ وه‌ک ئه‌م نموونه‌یه ده‌ری ده‌خات، زۆربه‌ی كاته‌كان پێشبینیی ده‌لاله‌ته عه‌مه‌لییه‌كانی زانیاریی زانستی دژواره، هه‌ر بۆیه‌ قووڵ بوون، به‌سوود بوون یان گرینگ بوون مه‌رج نیین بۆ‌ جیاكردنه‌وه‌ی زانست له نازانست.
مه‌به‌ستی زانست به‌رهه‌مهێنانی زانیارییه بۆ ڕوونكردنه‌وه و تێگه‌یشتن له بڕێک ڕووی جیهانی ده‌‌وروبه‌رمان. به‌ڵام كه‌ڵه‌كه بوونی زانیاری له‌ خودی خۆیدا جیاوازی ناخاته نێوان زانست و میتۆلۆژی. كه‌وایه چ تێكۆشانێک زانستییه و چی ده‌یكاته زانستی؟ چۆن و بۆچی زانیارییه‌ک له‌ لایه‌ن جڤاتی زانستییه‌وه وه‌رده‌گیررێ؟ دوو ده‌سته پێوه‌ر بۆ وه‌رگرتن یان ڕه‌تكردنه‌وه‌ هه‌ن. ده‌سته‌ی یه‌كه‌می پێوه‌ره‌كان پێوه‌ندییان به فۆرم یان پێكهاته‌ی مه‌نتقیی زانیارییه‌وه هه‌یه، ئه‌وده‌سته‌كه‌ی تریش به‌ستراوه به‌و به‌ڵگه‌یه‌وه كه زانیارییه‌كه له سه‌ری دامه‌زراوه. بۆیه كاتێک كه له سه‌ر سروشتی زانست ده‌دوێین جیاوازی داده‌نێین له‌نێوان یاساكان و تیۆرییه‌كاندا كه په‌وه‌ندییان به به‌رهه‌می زانسته‌وه‌ هه‌یه و میتۆده‌كان و لۆژیكی له‌شوێنگه‌ڕاندا كه ڕه‌وتی درووست بوون، تاقیكرانه‌وه‌ و پاڵێورانی زانیاریی زانستی پێک‌ده‌هێنن.
هه‌رچه‌ند شوبهاندن له‌وانه‌یه به ته‌واوی دروست نه‌بێت ده‌توانین زانست له‌گه‌ڵ كارگه‌یه‌كدا هه‌ڵسه‌نگێنین كه به‌رهه‌مگه‌لێک دروست ده‌كات بۆ ئه‌وه‌ی به‌رهه‌مێكی ته‌واو بوو بداته ده‌ست. به‌ڵام یه‌كێک له‌و شتانه‌ی پیشه‌سازی(سه‌نعه‌ت) له زانست جودا ده‌كاته‌وه ئه‌وه‌یه كه سه‌نعه‌ت به‌رهه‌می ماددی هه‌یه و زانست به‌رهه‌می فیكری. ئه‌ڵبه‌ت، زانست بۆته هۆی پێشكه‌وتگه‌لێكی بێ‌ژماری ته‌كنۆلۆژیی كه به میوه‌ و ئاكامی زانست داد‌ه‌نرێن. ئه‌م ئه‌نجامه عه‌مه‌لییانه خۆیان به‌س به‌رهه‌مگه‌لێكی له‌دووگه‌ڕانی زانستیین. مه‌به‌ستی ڕاستیی زانست ده‌ست‌خستنی زانسته: به‌رهه‌مه‌ بنه‌ڕه‌تییه‌كان فیكرین. ئێمه‌ له‌ پێشدا چون زانست وه‌ک به‌رهه‌م سه‌یر ده‌كه‌ین فۆرمێک كه ئه‌م ئایدیا و بیرۆكانه ده‌یگرن ده‌خه‌ینه پێش چاو. له‌ پاشان سه‌رنج ده‌ده‌ین ڕه‌وت و پرۆسه‌ی دروست بوونی زانست.
science : زانست
Scientist : زانستیار
knowledge : زانیاری، زانین
curiosity : زانخوازی
method : ڕێڕه‌و
process: ڕه‌وت
product: به‌رهه‌م